D’n oonderstaonde teks is ’n inleiding euver de vereineging COC Limburg in ’t Limburgs (’t Mestreechs dialek). ’t Kin zien tot de teks get foute bevat. Meh veer vinde ’t es Limburgse vereineging belaankriek um de Limburgse taol te gebruuke, ofste noe Limburgs sprik of geïnteresseerd bis in de taol. ’t Hoofketoer en ’t café vaan COC Limburg zitte gevesteg in Mestreech, aon de Bogaardenstraat 43 sinds 1979.
Al mie es 50 jaor aktief.
Al mie es 50 jaor aktief zèt COC Limburg ziech sinds 1972 in veur e Limburg boe-in edereine ziechzelf kin zien. Es vereineging, gedrage door lede en vrijwèllegers, stoon veer midde in de queer gemeinsjap en wèrke veer aon acceptatie, emancipatie en gelieke rechte. Veer zien groets um deil te zien vaan de federatie COC Nederland, es eine vaan de 19 regionaal COC’s die ziech inzètte veur de rechte en belange vaan de regebouggemeinsjap in Nederland. Same vörme veer ’n krachtege beweging die op lokaol, nationaol en internationaol niveau wèrk aon ’n inclusieve sameleving.
Väöl bereik, meh nog neet alles
Door de jaore heer höbbe veer väöl bereik: veurliechtinge op sjaole, veilige oontmoetingsplaotse en e sterk netwerk vaan steun en activisme. Toch is eus inzat nog ummertouw hel nudeg. Discriminatie, einzaamheid en oongeliekheid zien veur väöl queer persoene nog ummertouw realiteit. Dit belemmerd neet allein hun welzien, meh ouch hun kanse in de sameleving. Tegeliekertied zien ‘rs väöl die veural de behoefte höbbe um geliekgestumde te oontmoete en ’n gemeinsjap te vinde boe-in zie ziech toes veule.
Minserechteorganisatie en vereineging
De Minserechteorganisatie en vereineging COC Limbörg späölt hei-in ’n cruciaol rol. Veer zien ’n minserechteorganisatie en wel ’n vereineging die verbènt, oondersteunt en aonjaog. Same mèt us vrijwèllegers, lede en partners wèrke veer aon ’n inclusief samelèving boe-in ederein vrij en veileg kin leve, leefhöbbe en ziechzelf oontwikkele. Veer bringe lui same, versterke lokaal initiatieve en daoge beleidsmakers oet um inclusiever te wèrke.
Boe bouwe veer aon?
Veer bouwe aon ’n touwkomsbestendege en veerkrachtege organisatie boe-in diversiteit de norm is en ederein ziech gehuurd veult. Veer versterke eus positie es belangebehartiger door activisme en beleidsbeïnvleujing, breie veilige oontmoetingsplekke oet en zörge veur ’n sterker verbinding tösse lokaal gemeinsjappe. Educatie, veurliechting en zörg blieve speerpunte in eus werk. Door same te wèrke mèt maotsjappeleke organisaties en welzienepartners zörge veer deveur tot queer persoene in Limburg touwgaank höbbe tot de oondersteuning die ze nudeg höbbe. Es vereineging mèt ’n greujende achterbaank, e betrokke bestuur en e actief vrijwèllegersnetwerk wèrke veer ederen daag aon e Limburg boe-in ederein ziechzelf kin zien en volweerdeg deil oetmaak vaan de sameleving.
